Quotiens vero inter virum et uxorem iurgium intercesserat, in sacellum deae Viriplacae, quod est in Palatio, veniebant et ibi invicem locuti, contentione animorum deposita, concordes revertebantur. Dea nomen hoc a placandis viris adsecuta est, veneranda quidem et praecipuis et exquisitis sacrificiis colenda utpote cotidianae ac domesticae pacis custos, in pari iugo caritatis ipsa sui appellatione virorum maiestati debitum a feminis reddens honorem.