L. Cornelio Lentulo Fulvio Flacco consulibus, etiam contra Ligures intra Italiam bellum gestum est et de his triumphatum. Carthaginienses tamen bellum reparare temptabant, Sardinienses, qui ex condicione pacis ROmanis parere debebant, ad rebellandum impellentes. Venit tamen in Urbem legatio Carthaginiensium ad pacem impetrandam. T. Manlio Torquato C. Atilio Bulco consulibus de Sardis triumphatum est, et pace omnibus locis facta Romani finem pugnandi fecerunt, quod his post ROmam conditam semel tantum Numa Pompilio regnante contigerat.